Lubin (Błota), góspodliwe zelene město lažy kradu srjejź Błotow a se poměnujo teke Wrota do Dolnych – a Górnych Błotow. Ze swójimi 14.000 wobydlarjami jo Lubin wokrejsne město wokrejsa Dubja-Błota.
Lubin naspomnjejo se prědny raz pisnje wokoło lěta 1150. W lěśe 2000 jo město 850. jubilej swěśiło. Archeologiske wunamakanki w bogatej licbje pokazuju pak na rane wobsedlenje městna. Źinsa dopomina doraznje widne groźišćo Bórklin na słowjańske wobsedlenje ze 6. stolěśa.
Nejskerjej 1220 jo Lubin źěwinski měsćańske pšawo dostał.
Wjele změnow kněstwow jo było wót z wognjom wunuzkanych braśow a rubjenjow pśiwóźowane. Tśiźasćalětna wójna a Sedymlětna wójna zawóstajiłej docyste znicenje. W 30lětnej wójnje jo Lubin wót českego do sakskego wobsejźeństwa pśišeł.
Lubin jo se wuwił na stolicu markgrobojstwa Dolna Łužyca. Jogo doprědkaŕska forma kněženja – wuše amtske kněžaŕstwo ako nejwuše sudniske a zastojnske zastojnstwo město starego bogotojskego amta – jo měła za wuwiśe Dolneje Łužyce wjeliki wuznam.
Pó Wulichowańskich wójnach a Wienskem kongresu jo pśišeł Lubin k Pšuskej. Z něga sakskego głownego města kraja jo bywało pšuske wokrejsne město.
W slědnych dnjach 2. swětoweje wójny jo se město za 80% znicyło. Lubin jo něgajšny romantiski charakter małoměsta zgubił, dokulaž su teke w pówójnskem casu a w casu socialistiskeje twaŕskeje kultury hyšći wjele starych intaktnych chromow wótryli, aby městno za nowotwarje měli.
Tšojenja politiskego pśewrota 1989 su za město změny we wšyknych wobłukach pśinjasli. Wjele twaŕskich aktiwitow móžoš wósebnje srjejź města bytšo wiźeś.
Na negajšnem parknišću a smaze jo nastała Grodojska kupa ze zelenišćami, drogowańskimi šćažkami, móžnosćami za grajkanje, nowymi tšugami a groblami, wustawadłom a turistiskim centrumom města.
Z tym jo bywało toś to městno wažny zaměr za turisty, kenž wódychanje pytaju. Gósć how masowy turizm njenadejźo, ale na njogo caka wjelebócne pórucenje, aby Błota – w srjejźnej Europje jadnoraznu kulturnu krajinu – z typiskimi drobno roznogatymi tšugami wuzgónił.
Za swóje wobšyrne napšawy za turistisku a kulturelnu infrastrukturu jo Lubin w lěśe 1999 status „statnje pśipoznate wódychanišćo” dojśpił.